Unha vez valorados os posibles escenarios cara ao mes de xullo e certificada a imposibilidade de manter a total seguridade dos asistentes durante o evento, o comité organizador decidiu pensar xa na edición de 2022 para que compense a espera de dous anos. Así, o próximo Festival de Ortigueira celebrarase en xullo de 2022, e o concello xa anuncia que será o máis longo da historia, durando unha semana.

A diferenza do ano pasado, no que ata última hora se descoñecía con exactitude a evolución da pandemia por parte das autoridades, este ano si temos a certeza que non se pode garantir a seguridade sanitaria dos asistentes, e isto, tendo en conta que a Ortigueira achéganse grupos e afeccionados de todo o mundo para convivir e compartir cultura e música durante uns días, levou á organización a poñer a mirada na próxima edición para que compense a espera.

 

Segundo manifestou o alcalde Juan Muras, “todos somos conscientes do vivido durante este ano na nosa comarca, en España e no mundo en xeral. E sempre optaremos pola decisión máis segura para os habitantes de Ortigueira, así como para todos os que nos visitan desde os cinco continentes cada ano. É precisamente esa multiculturalidade, ese encontro, o que fai o noso festival tan único no mundo e o que precisamente o fai máis inviable ante unha pandemia destas dimensións. A pesares de que a decisión está clara, mantivemos comunicación puntual coa organización, coordinación e seguridade e todos os departamentos implicados do concello, e a decisión do mesmo xeito que decidimos o pasado ano, e moi ao noso pesar, é a de pospoñer a celebración do festival ao 2022.

Por desgraza o discurso repítese, este virus ataca o espírito mesmo da filosofía do Festival Internacional do Mundo Celta de Ortigueira. Non é un evento no que se poidan gardar as distancias, é un festival de unión, de celebración, de compartir. 

O reto para 2022 é moi grande, pois somos os primeiros que desexamos volver ver repletas de xentes as rúas, os comercios e os bares e restaurantes de Ortigueira. Do mesmo xeito sabemos que o encontro cultural que se celebra anualmente é moito máis que un festival, e non só por estar declarado de interese turístico internacional, senón polo encontro de xentes de diferentes países ao redor dunha cultura que os une. 

É por iso, porque sabemos que as expectativas serán máximas de fronte ao próximo festival, polo que non podemos máis que comezar a traballar desde hoxe mesmo para que o de 2022 sexa un evento inesquecible. En próximas datas iremos avanzando as novidades que acontecerán no próximo Festival de Ortigueira, pero xa podemos avanzar que será o máis longo da historia.” 

 

Ángel Lozano, concelleiro de Deportes e Festival engade que “queremos mostrar todo o noso apoio a todas esas persoas, colectivos, comercios, establecementos, asociacións e un longo etc. que se viron mermados debido a esta situación pandémica na que nos atopamos. Temos a intención na medida do posible e mentres as circunstancias sanitarias permítano, de achegar o noso grao de area á contorna afectada pola pandemia. Continuamos mantendo o noso compromiso coa música, os grupos e bandas e o panorama galego que non fai máis que crecer, por iso seguimos traballando en poder ofrecervos a mellor das nosas versións, aínda que sexa en 2022, algo no que non deixamos de traballar desde o 2020.

Polo momento, a edición deste ano do RUNAS segue en pé, con máis ganas que nunca. Estamos a ultimar os detalles para lanzar a edición, que se espera alucinante. Isto significa que se no 2022 a situación permite realizar o festival, contaremos con 9 grupos finalistas no noso escenario, o que nos augura unha festa á altura das ganas que teremos de divertirnos e gozar.

Esta decisión non foi fácil de tomar, pero é responsabilidade de todos conseguir que o ano que vén podamos estar aínda máis unidos que nunca gozando da música e o ambiente que tanto botamos de menos“

En palabras do concelleiro, “Non é a noticia que nos gustaría dar, pero dámola conscientes de que é a mellor decisión dadas as circunstancias. Do mesmo xeito que o pasado ano moitos outros festivais xa anunciaron a súa cancelación, e nós xa estabamos preparados para este posible aprazamento. Agradecemos as mostras de apoio recibidas e xa temos todos os esforzos postos nas novidades para 2022. Sabemos da importancia do festival para o turismo e a economía de Ortigueira, pero tamén como punto de encontro anual da música e a cultura celta de toda Europa. Pero Ortigueira tivo un ano de loita constante contra este virus, que algúns de nós tivemos a desgraza de vivir moi de preto, polo que habemos de primar a saúde e seguridade. “

 

Segundo comenta Alberto Balboa, coordinador do festival, “queremos que cando sexa posible, os asistentes e veciños volvan gozar do festival como o evento que é, en colectivo, compartindo experiencias, gozando xuntos da música que tantas alegrías dános e convivindo en harmonía todos os días programados do evento.

O pasado ano a decisión foi tomada dun modo algo máis incerto, pero nesta ocasión e tras estar todo o ano en contacto con artistas, mánagers e festivais de toda Europa, a decisión é máis evidente. Aos poucos os que non tiñan xa cancelado, cancelan ou adoptan formatos que serían inviables para nós, por formato e concepto. Pero iso non significa que vaiamos estar parados ata 2022, prepararanse gran cantidade de actividades, entre elas xa temos case á vista o lanzamento do Proxecto Runas 2021 de novos valores da música folk, tras o éxito da pasada edición, na que se bateu a concorrencia de bandas, de diversidade de nacións representadas e se recolleron máis de 110.000 votos na web para elixir os grupos favoritos, este ano promete ser mesmo máis concorrido, pois se promocionará con maior antelación; as bandas xa se adaptaron ao formato e cada vez está a ter un maior alcance internacional”

 

Tanxugueiras e Red Hot Chilli Pipers primeiras confirmacións para #Ortigueira2022

Feb 16, 2022

O Festival Internacional do Mundo Celta de Ortigueira volve coa que será a súa edición máis longa. #OMáisLongoDaHistoria terá lugar do 10 ao 17 de xullo, con Tanxugueiras e Red Hot Chilli Pipers como…

DEIXOUNOS O GRAN PADDY MOLONEY

Out 15, 2021

O pasado luns 11 de octubre foi un día triste para tod@s @s amantes da música en xeral e para nós en particular. Foise o mestre Paddy Moloney, celebramos ter desfrutado da súa arte…

O vallisoletano Germán Ruiz, terceiro e último finalistas do Concurso Runas 2021 dos novos valores da música celta

Xul 30, 2021

Finalizado o prazo de votación, dáse a coñecer o terceiro e último dos grupos finalistas de 2021 que actuarán en 2022 no Festival Internacional do Mundo Celta de Ortigueira.   Tras o anuncio dos…

Os galegos Trikitrí, segundos finalistas do Concurso Runas 2021

Xul 29, 2021

Finalizado o prazo de votación, dáse a coñecer o segundo dos tres finalistas de 2021 que actuarán en 2022 no Festival Internacional do Mundo Celta de Ortigueira.   Tras o anuncio onte do primeiro…

Os estremeños Groovy Celtic Band, primeiros finalistas do Concurso Runas 2021

Xul 28, 2021

Finalizado o prazo de votación, dáse a coñecer o primeiro dos tres finalistas que actuarán en 2022 no Festival Internacional do Mundo Celta de Ortigueira.    Groovy Celtic Band é unha banda de seis…

Aberta a votación online para elixir aos 3 grupos finalistas do concurso Runas de novos valores da música celta

Xul 05, 2021

Finalizado o prazo para a presentación de solicitudes para o Proxecto Runas 2021, recibiuse a participación de 24 bandas de 11 comunidades autónomas, entre as cales destaca, ademais de Galicia, con nove grupos noveis…