Talisk, Susana Seivane e Covagueira, novas confirmacións para Ortigueira 2022

O Festival Internacional do Mundo Celta de Ortigueira incorpora a Talisk, Susana Seivane e Covagueira ao cartel de #OMáisLongoDaHistoria, que se celebrará do 10 ao 17 de xullo. 

Despois dos anuncios de Tanxugueiras, Red Hot Chilli Pipers, Wolfstone, Luar na Lubre, Baiuca e Xosé Lois Romero e Aliboria o comité organizador confirma tres novas actuacións para o Festival de Ortigueira 2022.  

Talisk, un dos grupos de folk máis populares de Escocia, chegará a Ortigueira por primeira vez co seu son explosivamente enérxico pero enxeñosamente tecido. O trío formado por Mohsen Amini, Benedict Morris e Graeme Armstrong presentará o seu terceiro disco “DAWN” sobre o escenario principal o xoves 14 de xullo. 

Susana Seivane volve ao Festival de Ortigueira coa súa proposta que mestura a música tradicional con sons novidosos. Xunto coa súa característica gaita e un elenco de cinco músicos de primeiro nivel, farán desfrutar ao público cunha selección do seu repertorio, e algúns temas do seu último traballo “FA”, o venres 15 de xullo. 

Covagueira, o grupo nado no seo da Escola de Gaitas de Ortigueira, terá a súa estrea no Festival o xoves 14 de xullo. Un grupo formado en 2015 que foi evolucionando en diversos formatos ata chegar no 2019 á formación actual, con novos instrumentos e sons, pero mantendo a esencia característica de Covagueira.

Ademais, lembramos que o prazo para entregar toda a documentación para presentarse á Feira de Artesanía (que soamente será válida por correo certificado ou mediante entrega presencial) remata o mércores 27 de abril. A súa vez o prazo para inscribirse no Concurso Runas 2022, onde grupos noveis optan por actuar en #Ortigueira2022, remata o venres 29 de abril.

Descarga as bases de Artesanía en: www.festivaldeortigueira.com/artesania

Descarga as bases do Runas en: www.festivaldeortigueira.com/runas