A Escola de Gaitas de Ortigueira encabezará #OMáisLongoDaHistoria

Fundadora do Festival en 1978 e todo un referente en Galicia, será un ano máis pulmón, corazón e alma do Festival Internacional do Mundo Celta de Ortigueira,  que se celebrará do 10 ao 17 de xullo e cuxa programación de horarios de concertos xa está dispoñible na web  www.festivaldeortigueira.com/programacion

A  Escola de Gaitas de Ortigueira actuará, un ano máis, no Festival de Ortigueira, porque non é posible entender o un sen a outra. Así o expresa o título do último disco da formación, “O  noso Festival”, do que de seguro interpretarán algún tema cando o venres 15 de xullo suban ao escenario Estrella Galicia en #OMáisLongoDaHistoria e reciban a calor do sempre entregado público de Ortigueira. Tamén o seu corpo de baile engadirá cor e alegría a un concerto que, segundo avanza o seu presidente Bruno Lozano, “incluirá varias sorpresas que aínda non podemos desvelar”.

Aínda que todo o pobo de Ortigueira, hostalería, comercio e veciñanza, envórcase para que este ano, tras dous durísimos anos de ausencia, volvan vivir días (8 nesta edición) de celebración e alegría nos que compartir unha cultura e música común, desde hai varios meses moitos dos integrantes desta institución do folk traballan duro preparando todo para a chegada e acomodo da multitude de bandas que encherán de alegría e música as rúas de Ortigueira. Por esas rúas desfilarán, chegadas desde diversos puntos do mapa próximos como Ladrido, a 6 km da alameda ortigueiresa, ou non tan próximos como Johnstone, a máis de 2.500 km de distancia, as seguintes formacións:

• Agrupación Cultural Buxainas
• Asociación Cultural Troula de Ortegal
• Asociación de Música e Danza Tradicional Queiroa
• Bagad de Vannes Melinerion
• Banda de Gaitas de Guillarei
• Banda de Gaitas de Ladrido
• Banda de Gaitas do Ortegal
• Banda de Gaitas do Padroado da Cultura de Narón
• Banda de Gaites El Gumial
• Bandina Popular Los Gascones
• Cuarteto Tradicional Illa Pancha
• Grupo de Baile Tradicional Fitoria
• Grupo Tradicional Marbadás
• Johnstone Pipe Band

Todas elas, lideradas pola Escola de Gaitas de Ortigueira, sumaranse a un cartaz que o comité organizador elaborou cunha especial e intencionada énfase nas formacións de orixe galega, as cales representan máis do 60% do total. Todas elas conseguirán xunto ao resto de actividades, exposicións e obradoiros que do 10 ao 17 de xullo, Ortigueira se convirta un ano máis na capital mundial da música celta.