Máis de 15 bandas e agrupacións pechan o cartel do Festival de Ortigueira

As formacións encargadas de encher de música e ledicia as rúas de Ortigueira poñen a guinda a unha programación que volverá converter a Ortigueira na capital da cultura celta durante oito días.

Apenas quedan dúas semanas para a saída dunha nova edición do que será el 45 aniversario do Festival máis importante de España no que a música tradicional celta se refire. A dirección acaba de confirmar as agrupacións que acudirán a protagonizar o Festival na rúa, que como sempre estará protagonizado por formacións de orixe galega, se ben este ano os nosos veciños asturianos estarán moi ben representados tanto nas rúas como no escenario Estrella Galicia, pois serán sete as formacións veciñas que actuarán entre o próximo 9 e o 16 de xullo no Festival Internacional do Mundo Celta de Ortigueira.

Entre as bandas que se anunciaron para pechar o cartel desta edición atópanse a Banda de Gaitas do Ortegal, Banda de Gaitas Ladrido, Asociación Cultural Troula do Ortegal, Airiños de Fene, Banda de Gaitas Abelladeira, Asociación Cultural Saiñas de Xove, Grupo Folklórico Trebeyu, Banda de Gaitas La Laguna del Torollu, Asociación Cultural Son D´Aquí, Airiños do Eume, Bandina La Garrapiella, Charanga Alxibeira, Fol do Raxal, No Cómbaro e Os Netos do Escribano.

A organización ultima preparativos para a cita máis importante no panorama festivo da vila Ortegana, de feito acaban de anunciarse as restricións de tráfico, que por cuestións de seguridade, terán lugar entre os días 6 e 17 de xullo antes do comezo do Festival e durarán ata o día seguinte á súa finalización.

Ademais, mañá sábado terá lugar no Teatro de Beneficencia ás 20:00 h. a presentación do libro e documental “Berpiztu” de Kepa Junkera, onde se repasa a súa vida e traxectoria artística. O documental inclúe imaxes de arquivo nunca antes vistas sobre o músico, compositor e produtor vasco, así como testemuños de artistas que teñen colaborado con el como Ara Malikian, Estrella Morente, Pedro Guerra, Pablo Milanés, Dulce Pontes, Santiago Auserón, Uxía ou Budiño. Tamén terá lugar a inauguración da exposición “Berpiztu, la expo” dos fotógrafos Sindo Novoa e Sonia Navas, que se poderá visitar durante o Festival.