Fransy, Davide e Cibrán, Fiandola e Caamaño&Ameixeiras únense ao Festival de Ortigueira

O Festival Internacional do Mundo Celta de Ortigueira suma tres novas agrupacións galegas ao cartaz de #OMáisLongoDaHistoria, que se celebrará do 10 ao 17 de xullo.

O comité organizador incorpora tres novos grupos de cara ao Festival de Ortigueira 2022. Fransy, Davide e Cibrán, Fiandola e Caamaño&Ameixeiras únense a Tanxugueiras, Red Hot Chilli Pipers, Wolfstone, Luar na Lubre, Baiuca, Xosé Lois Romero e Aliboria, Talisk, Covagueira, Susana Seivane, Digresk, Os D´Abaixo e Dequenvessendo.

Fransy, Davide e Cibrán unen a música tradicional galega á vangarda na súa proposta sonora. Con Fransy González e Davide Salvado á percusión e á voz, e con Cibrán Seixo ao violín procesado e o moog, este grupo pon en valor a tradición cultural galega, aportando aires novidosos e contemporáneos á música e ás letras tradicionais. Actuarán o domingo 10 de xullo en #Ortigueira2022 despois do seu paso no 2021 polo #FestivalNoTeatro. 

Fiandola actuará o luns 11 de xullo en Ortigueira. Tras máis de 25 anos de traxectoria, o grupo compostelán segue a aportar unha visión harmónica e tímbrica da música tradicional galega, creando un particular repertorio con selo propio e mantendo unha profunda raíz tradicional, na que o baile ten un protagonismo destacado.

Caamaño&Ameixeiras é un dúo ligado á música e ao baile de raíz formado por Sabela Caamaño (acordeón cromático) e Antía Ameixeiras (violín e voz). De natureza principalmente instrumental, toma como punto de partida a tradición, entendida como algo vivo e en constante cambio, para crear despois a súa propia linguaxe. Tras o seu paso polo #FestivalNoTeatro no 2021 chegarán a #OMáisLongoDaHistoria para actuar no escenario principal o venres 15 de xullo, no que aseguran será un concerto moi especial.