Tres incorporacións internacionais completan o cartaz do Festival de Ortigueira

O Festival Internacional do Mundo Celta de Ortigueira incorpora a Fred Morrison, Bagad de Vannes Melinerion e Johnstone Pipe Band, pechando así o cartaz de #OMáisLongoDaHistoria, que se celebrará do 10 ao 17 de xullo.

Cunha longa traxectoria ás costas e influencias de grandes artistas e compositores escoceses, Fred Morrison aportará ao #FestivalNaIgrexa o sábado 16 de xullo a súa experiencia e dominio da gaita, facendo resoar as míticas highland pipes e as uillean pipes, nun entorno tan especial como a Igrexa de Santa Marta de Ortigueira.

A bretoa Bagad de Vannes Melinerion, que tamén actuará o sábado 16 de xullo, no seu caso no  escenario principal, despregará o seu repertorio no que mestura pezas tradicionais bretoas e composicións propias, ao ritmo da percusión e ao son das inconfundibles bombardas e cornamusas. 

A banda de gaitas escocesa Johnstone Pipe Band, fundada en 1943, e con experiencia en multitude de concursos a nivel nacional e internacional, chegará ao escenario de Ortigueira o venres 15 de xullo cunha mostra da súa estrutura formada por unha mestura de músicos veteranos e novos, instruídos desde pequenos na propia banda.

Coas últimas incorporacións internacionais o Festival Internacional do Mundo Celta de Ortigueira pecha a súa programación musical e revela o cartaz completo para #OMáisLongoDaHistoria, ilustrado polo ortegueirés Martín Cal Mouriño.

O esforzo deste ano quixo estar á altura do agarimo, ánimo e apoio recibido por todos os seguidores da música celta, que tanto sentiron estes dous anos de ausencia. Desde o comité organizador conseguíuse conformar un cartaz cun equilibrio entre os talentos emerxentes e consolidados do panorama folk internacional, cun especial e intencionado énfase nas formacións de orixe galega.

Do mesmo modo, a organización agarda que do 10 ao 17 de xullo todos os asistentes volvan a compartir, como se ven facendo desde 1978, oito días de convivencia, música e posta en valor dunha cultura común para a que non hai fronteiras.

Ademais, o concerto de Óscar Fernández e Manu Fraguela pasa ao sábado 16 no Teatro de Beneficencia dentro do ciclo #FestivalNoTeatro.