O Concurso Runas, que se vén celebrando desde o ano 2000, ten como obxectivo a difusión da cultura e a música celta a través da promoción dos grupos noveis.

O comité técnico do Concello de Ortigueira anuncia aos 10 grupos seleccionados para a seguinte fase do concurso tras avaliar as 20 propostas recibidas de grupos provenientes de diversos países de todo o mundo. Para a súa selección tivéronse en conta aspectos como a calidade musical, a innovación e orixinalidade do repertorio presentado e a súa relación coa música propia do Festival en sintonía coa programación do mesmo.

Nesta segunda fase dáse inicio ás votacións online na web do Festival, que estarán abertas ata o venres 19 de maio ás 14:00 h. Cada persoa que o desexe poderá escoitar as propostas de cada grupo e votar polos seus 3 favoritos en www.festivaldeortigueira.com/runas 

Ao resultado da votación online sumaránselle os votos emitidos polo xurado profesional que, nesta edición, estará formado por:

– Ángel Lozano, concelleiro de Deportes e Festival do Concello de Ortigueira. 

– Alberto Balboa, coordinador do Festival Internacional do Mundo Celta de Ortigueira.

– Xiana Lastra, integrante de A Banda da Loba.

– Miguel Doval,  director de Airiños de Fene

Os tres grupos finalistas serán anunciados nas redes sociais e na web do Festival, a razón dun grupo cada día, o mércores 24, xoves 25 e venres 26 de maio de 2023. Estes actuarán o luns 10 de xullo no Festival Internacional do Mundo Celta de Ortigueira, que se celebrará do 9 ao 16 de xullo do 2023. Os 10 grupos seleccionados para a 24ª edición do Concurso Runas son:

Alienda – Asturias

Clann an Drumma – Escocia

Darash – Andalucía

Guieldu – Asturias

Lenda Ártabra – Galicia

Mediarea – Galicia

Muro Kvartet – Aragón

Ramalleira – Madrid

Ros – Cataluña

Sons of Exodus – Galicia

Dende hoxe, tamén está dispoñible na web do Festival un avance por días da programación. Nas próximas semanas, anunciaranse os grupos e actividades que completan a edición de 2023 que, por segundo ano consecutivo, terá oito días de duración.
Consulta a programación por días en www.festivaldeortigueira.com/programacion