O Festival de Ortigueira 2024 celebrarase do 11 ao 14 de xullo

O novo executivo local vén de conformar o Comité Organizador do Festival Internacional do Mundo Celta de Ortigueira que, na súa primeira reunión, acorda as datas e a duración da próxima edición.

Este novo ente ten como principal obxectivo, á parte de profesionalizar esta área de xestión, facer parte activa da toma de decisións e da organización do Festival á Escola de Gaitas de Ortigueira, fundadora do mesmo, e á Asociación de Comercio e Hostalería Ortegana (ACO). O comité está formado por:

– Valentín Calvín, alcalde de Ortigueira e responsable do Festival Internacional do Mundo Celta de Ortigueira.

– Alberto Balboa, director do Festival Internacional do Mundo Celta de Ortigueira. 

– Escola de Gaitas de Ortigueira, representada nesta ocasión polo seu presidente Bruno Lozano.

– Asociación de Comercio e Hostalaría Ortegana (ACO), representada nesta ocasión pola súa presidenta María José Mera.

– Departamento de Comunicación del Festival, representado nesta ocasión por Diego Vilar. 

Na súa primeira reunión, e tras unha avaliación da anterior edición e da dinámica dos últimos anos, tomouse a decisión de volver ao formato de catro días de Festival. Esta decisión vén dada tras unha reflexión sobre cales son os obxectivos para as próximas edicións, poñendo en consideración todos os aspectos a mellorar e profesionalizar e tendo claro que o obxectivo é atopar un novo modelo de xestión do Festival sen perder a súa esencia.

#Ortigueira2024 celebrarase entre o xoves 11 e o domingo 14 de xullo, no que promete ser unha cita onde os amantes da música e a cultura Celta volvan gozar dunha das ofertas culturais máis atractivas de toda Europa. A programación centrarase en atraer a grupos de referencia do panorama Celta, cunha especial atención aos grupos galegos e ás novas correntes do folk mundial.