Anxo Lorenzo, Rubén Alba e Noon súmanse aos xa confirmados Yves Lambert, Solas, Lúnasa, Valtos e Xara 

Como ven sendo habitual, o Teatro da Beneficencia do Concello de Ortigueira acolleu, este sábado 7 de marzo, o acto de presentación do cartel que será a imaxe do Festival Internacional do Mundo Celta de Ortigueira. O gañador do Concurso de Carteis promovido pola entidade, ao que se presentaron máis de 100 propostas, é obra dos ponteses Juan Prieto e Joseba Silvent, e a súa revelación estivo acompañada por un avance da programación musical do Festival. 

O acto comezou coa intervención do alcalde de Ortigueira, Valentín Calvín, quen destacou a consolidación do Festival como epicentro mundial da músical folk e celta. Proba deste fito, que supera as expectativas ano tras ano, son os momentos inesquecibles que se dan cada verán, no que merece especial mención o acontecido no 2025 co 50º aniversario da Escola de Gaitas de Ortigueira: “Vivimos momentos inesquecibles, como o Desfile das Nacións Celtas coa Escola ao completo, con integrantes actuais e das diferentes xeracións que viviron o fulgor da Escola durante toda a súa traxectoria e, co seu membro fundador e primeiro director, Javier Garrote á fronte, rematando nunha Praza de Isabel II ateigada e emocionada”. 

Tras lembrar os momentos que xa forman parte da memoria do Festival, o acto pasou a un dos instantes máis emotivos da tarde. Nun xesto emotivo: o alcalde convidou a subir ao escenario a Bruno Lozano para renderlle unha pequena homenaxe pola súa traxectoria á fronte da presidencia da Escola de Gaitas durante os últimos doce anos. En agradecemento, o alcalde fixo entrega do escudo do Concello de Ortigueira, como recoñecemento institucional ao seu compromiso, o traballo realizado e ao pulo dado á Escola durante a súa etapa. Un acto que Bruno Lozano agradeceu, poñendo en valor o esforzo de toda a Escola na contribución ao Festival: “o traballo é de todos, eu simplemente son un nome. A Escola segue sendo referente e a mellor banda de gaitas do mundo”. 

Logo foi o turno dun dos momentos máis agardados cada ano, a presentación en primicia da imaxe gráfica deste 2026, que este ano recaeu nos veciños ponteses, Juan Prieto, deseñador e tatuador, e o deseñador Joseba Silvent, gañadores dun certame “que volveu demostrar a enorme capacidade de convocatoria e inspiración que xera o noso Festival, con máis de 100 propostas recibidas, con estilos, técnicas e interpretacións moi persoais”. Da obra, destacou tamén a naturalidade e forza coa que esta conecta co espíritu e esencia do Festival, e foron os gañadores quenes explicaron en detalle o seu proceso creativo da súa obra titulada Romaría: “intentamos representar a atmósfera a través das diferentes etapas que viviu o Festival e homenaxear ao primerio cartel empregando as mesmas cores”. 

Co cartel desvelado, foi o turno de Sofía García, secretaria da Escola de Gaitas, quen anunciou algunhas das bandas que percorrerán as rúas de Ortigueira, Bagad de Vannes, Banda Gaites Saxum, Grupu Etnográficu L’Oriente e Bandina Los Maruetos. Mais, como nova integrante no Comité Organizador, quixo poñer en valor que o espíritu da Escola segue e seguirá: “Ese espírito baséase na transmisión, no relevo xeracional, en aprender de quen estivo antes e en asumir con responsabilidade. Un traballo que continuaremos co saber facer e a pegada que Bruno, e os directores anteriores, deixan na Escola”. 

Á presentación das bandas que formarán parte do Festival na Rúa, seguiulle o avance dos artistas convidados ao escenario principal da Alameda. Alberto Balboa, director do Festival, como é habitual, foi o responsable de introducir a programación: “Solas, referente indiscutible da música celta nos EEUU, regresan tras vinte anos desde a súa última actuación no Festival. Valtos, nativos da escocesa Illa de Skye, achegaranos unha proposta electrónica que xa conquistou ao público escocés acadando nominacións e premios nas illas británicas. O quintento irlandeses Lúnasa conquistou ao público no Festival no Teatro no 2018 e tamén no verán, onde os poderemos escoitar as súas melodías este ano, e o trío bretón Noon que chega por primeira vez ao noso escenario. O galego Anxo Lorenzo, volve coa súa banda tras o seu paso no 2023 con Eoghan Neff, e da veciña Asturias contaremos co gaiteiro Rubén Alba e a súa banda, que subiranse por segunda vez ao escenario do Festival.”

Pechou o acto o alcalde con verbdas de agradecemtno para todas aquelas persoas e entidades que fan posible o Festival: “patrocinadores públicos e privados, artistas, voluntariado, Protección Civil, corpos e forzas de seguridade, persoal técnico e traballadores e traballadoras do Concello, encabezados polo director do Festival, Alberto Balboa, polo seu compromiso e profesionalidade. E, unha vez máis, á Escola de Gaitas de Ortigueira, por ser un piar e motor do Festival.” Tras o cal deu paso á mellor forma de pechar este acto de presentación, con música, e presentou a actuacióndo grupo pontés Nimbos. 

Recollida de obras non seleccionadas

Os traballos non seleccionados poderán ser recollidos presencialmente ou reclamados vía Fax ou correo electrónico ao enderezo carteis@festivaldeortigueira.com seguindo o procedemento recollido nas bases do concurso, a partir do día 9 de marzo, tendo ata o 9 de abril para xestionar a súa recollida.

A organización non quere deixar de agradecer o esforzo de todos os participantes e resaltar novamente a altísima calidade dos traballos recibidos. 

O Festival recibiu 51.000€ en el 2025

No marco da convocatoria do programa de subvencións para o apoio ao desenvolvemento de festivais na provincia da Coruña en 2025, o Festival Internacional do Mundo Celta de Ortigueira é beneficiario destacado un ano máis.

Máis dunha vintena de festivais e concellos de diferentes características na provincia da Coruña foron concesionarios deste programa de axudas. O Festival Internacional do Mundo Celta de Ortigueira foi o encontro musical galego que maior importe subvencionable recibiu, un total de 51.000€ na modalidade destinada a concellos e outras entidades locais, seguido de festivais cinematográficos como o Festival Internacional de Cinema Cineuropa ou o Festival Internacional de Cinema Curtocircuíto, ambos en Santiago de Compostela.

Unha axuda que fai posible que o Festival medre cada ano, superando nesta edición as 110.000 persoas visitantes, e que manteña o seu compromiso coa visibilización do panorama folk e celta tradicional e emerxente, tanto en Galicia como a nivel internacional.

A obra, “Romaría”, elaborada por Juan Prieto e Joseba Silvent, veciños do Concello de As Pontes de García Rodríguez, levouse o primeiro premio, o segundo foi para “Foliada”, de Alexandre Sequeiros e o terceiro para Anxo Varela co cartel “O son da xente”. As 101 propostas presentados serán expostos ata o sábado 7 de marzo, día no que se desvelarán as obras gañadoras no Teatro da Beneficencia 

O pasado mes de xaneiro, a Unidade Xestora para o Concurso de Carteis deste 2026, seleccionou as obras aceptadas á participación no Concurso de Carteis para o 2026, desestimando aquelas que non cumprían cos requisitos de participación. Unha vez realizada esta revisión, foron admitidas a concurso un total de 101 que foron valoradas polo xurado profesional seleccionado polo Concello de Ortigueira. 

O xurado, reunido a mañá do pasado sábado 7 de febreiro e seleccionado polo Concello de Ortigueira, estivo composto por: 

• Valentín Calvín, alcalde do Concello de Ortigueira, en represntación do Concello. 
• Estefanía Pérez, mestra de Educación Primaria e vicepresidenta da Escola de Gaitas de Ortigueira. 
• Patricia Pérez, licenciada en Historia da Arte e profesora de Debuxo no IES Ortigueira. 
• Mónica Fustes, veciña de Espasantes e creadora da imaxe do 2025. 
• Elisardo de la Cruz, responsable do Departamento de Comunicación do Festival. 

Tras unha complicada deliberación, na que o xurado destacou a calidade artística e técnica das  obras presentadas, este seleccionou un total de 10 obras para a votación final. Unha votación na que se tiveron en conta diferentes aspectos: a calidade gráfica e plástica, o impacto, a eficacia publicitaria e de imaxe e a versatilidade e creatividade para a elaboración de materiais promocionais das obras presentadas. 

Unha vez comunicadas as votacións individuais, moi similares entre si, o xurado destacou da obra gañadora a súa capacidade para representar a identidade, a esencia e a tradición do Festival. A obra, titulada “Romaría”, é un traballo colaborativo realizado polos ponteses Juan Prieto e Joseba Silvent, quen manifestaron a súa satisfacción, pero tamén incredulidade, ao considerar inicialmente que podería tratarse dunha broma, tras recibir a chamada de Valentín Calvín, alcalde do Concello, informándoos do veredicto.

O cartel gañador, premiado con 4.000€ darase a coñecer o próximo sábado 7 de marzo no Teatro da Beneficencia, xunto cos carteis que acadaron o segundo e terceiro posto, “Foliada”  de Alexandre Sequeiros e “O son da xente” de Anxo Varela, premiados con 1.000 e 700 euros respectivamente. 

Exposición das obras presentadas 

Co obxectivo de achegar as propostas presentadas a concurso ao público, estas permanecerán expostas na sala de exposicións do Concello de Ortigueira (primeiro andar). A mostra poderá visitarse en horario de 10:00 a 14:00 horas, de luns a venres, ata o sábado 7 de marzo, día no que se darán a coñecer as obras gañadoras do certame. Nesa mesma xornada, tamén poderán verse antes da presentación oficial os carteis gañadores.

Os traballos non seleccionados poderán ser recollidos presencialmente ou reclamados vía Fax ou correo electrónico ao enderezo carteis@festivaldeortigueira.com seguindo o procedemento recollido nas bases do concurso, a partires do día 9 de marzo, tendo ata o 9 de abril para xestionar a súa recollida.

A organización non quere deixar de agradecer o esforzo de todos os participantes e resaltar novamente a altísima calidade dos traballos recibidos. 

Fotografía: Elisardo de la Cruz, Patricia Pérez, Valentín Calvín, Mónica Fustes, Estefanía Pérez

●  O proxecto, unha iniciativa do Concello de Ortigueira a través da área formativa do Festival, codirixido por Ugia Pedreira e Óscar Górriz, regresa en 2026 para converter Ortigueira en epicentro da produción lírica e musical.

●  O programa académico afonda no coñecemento con mestrías especializadas sobre o corpus dos cancioneiros, a variación melódica tradicional e o verso libre.

●  O prazo de inscrición para as 25 prazas dispoñibles remata o vindeiro 16 de febreiro.

Tras o éxito da súa primeira edición, o Laboratorio de Cántigas Novas (LAB) regresa este mes de febreiro a Ortigueira co obxectivo de consolidar un espazo de creación musical e poética no norte de Galicia. O proxecto, unha iniciativa do Concello de ortigueira integrada na área formativa do Festival de Ortigueira e coordinado pola Escola de Gaitas de Ortigueira, busca revitalizar a transmisión oral non máis aló da conservación, poñendo a creación no centro, cun novo programa que conecta a tradición coa contemporaneidade.

Baixo a dirección artística e executiva dos compositores Ugia Pedreira e Óscar Górriz, o LAB 2026 propón un percorrido de cinco meses, de febreiro a xullo, que culminará coa estrea oficial das pezas creadas, dentro da programación do Festival de Ortigueira 2026.

As mestrías

Este ano, as mestrías foron deseñadas para dotar ao alumnado de ferramentas de nivel para a composición, contando con perfís diversos pero de referencia, que impartirán contidos moi orientados á creación lírica e musical desde diferentes perspectivas. Mondra, recente fenómeno da música galega, traballará na renovación da lírica tradicional desde unha perspectiva contemporánea, mentres que Manolo Rico, musicólogo e especialista en tradición oral, afondará no corpus literario e musical dos cancioneiros galegos, analizando os xéneros e os recursos para a modificación de cántigas. Pola súa banda, Dores Tembrás, poeta e filóloga, achegará técnicas da poesía contemporánea baixo o título A palabra que atravesa, con dinámicas creativas arredor do verso libre, e Sergio de la Ossa, especialista en arquivo, impartirá un obradoiro sobre melodía tradicional centrado nos procesos de variación de ritmos e melodías presentes en cántigas tradicionais para a súa aplicación na creación de novas pezas. Finalmente, Pedro Pascual e Pablo Hernández Mejías impartirán coñecementos harmónicos e asumirán a dirección musical e os arranxos, fusionando a raíz galega con formas europeas, atlánticas e caribeñas.

OFF-LAB e integración comunitaria

Como novidade para 2026, o LAB racha os muros da aula para integrarse na vida social da comarca. Créase o OFF-LAB, un ciclo de obradoiros abertos ao público xeral que ofrecerá

NP 02.02.2026 | LAB 2026 | CAST-GAL

formación en Regueifa con Lupe Blanco, Canto e Pandeireta de Bergantiños con Fransy González e Percusión miuda con Ramón Dopico.

O programa reforza o seu carácter vivencial recuperando a función social da música. As xornadas creativas compleméntanse con almorzos colectivos e foliadas en parroquias dos arredores, situando a aprendizaxe musical no seu contexto tradicional.

NP 02.02.2026 | LAB 2026 | CAST-GAL

Unha aposta polo coñecemento

Segundo explica a dirección do proxecto, o LAB propón unha inmersión integral na nova creación: “Non buscamos a repetición de esquemas tradicionais, senón dotar aos creadores e creadoras de ferramentas para que, coñecendo a fondo a raíz e os códigos da oralidade, poidan narrar o seu propio tempo. Tamén, queremos que Ortigueira, referencia do folk e da música tradicional no verán, se consolide como canteira autoral durante o resto do ano“.

Inscricións abertas

O LAB oferta 25 prazas para persoas a partires de 16 anos interesadas na composición, a música ou a escrita, sen necesidade de formación académica previa pero con interese na música e poética galega. O prazo de matrícula está aberto ata o 16 de febreiro ás 23:59h.

Para máis información e inscricións, as persoas interesadas poden contactar a través do correo electrónico, enviando nome completo e número de teléfono a: lab@festivaldeortigueira.com

Publicada a lista de obras admitidas e excluídas

Reunida a Unidade Xestora do Concurso de Carteis para esta edición 2026 do Festival de Ortigueira, e unha vez analizado o cumprimento dos requisitos das obras presentadas, o Concello de Ortigueira publica a lista de carteis admitidos e desestimados para a súa participación no concurso. 

O xurado reunirase en febreiro para valorar as obras admitidas e emitir o correspondente veredicto.

A publicación pode consultarse en https://festivaldeortigueira.com/concurso-de-carteis/ e na sede electrónica do Concello de Ortigueira.

Artistas da talla de Yves Lambert, Lúnasa, Solas e Valtos actuarán en Ortigueira entre o mércores 8 e o domingo 12 de xullo do 2026 

O Comité Organizador do Festival Internacional do Mundo Celta de Ortigueira, a raíz do éxito do pasado ano, potenciará a Vila Celta como espazo propio do Festival, outorgándolle maior peso dentro da programación abrindo o Festival o mércores e pechando a súa programación o domingo. 

A programación da Vila Celta concibe como unha oferta musical e cultural complementaria aos concertos no escenario principal, que xa conta coas súas primeiras confirmacións para o verán. Tras a estelar actuación de La Bottine Souriante no 2025, este ano o Festival contará coa presenza do seu vocalista original e alma deste grupo, Yves Lambert, que volverá ao Festival oito anos despois da súa última actuación. Xunto a él regresarán nomes consolidados do panorama folk internacional, como o quinteto irlandés Lúnasa e o quinteto estadounidense de influencia irlandesa Solas, que volve 20 anos despois celebrando o seu 30º aniversario. Completan a programación Valtos, dúo escocés de fusión celta e electrónica con raíces na Illaa de Skye, e Xara, grupo madrileño gañador do Concurso Runas 2025. Unha ampla representación que completarase nos próximos meses con bandas, grupos e formacións en representación das diferentes Nacións Celtas. 

Además da programación musical, ol Festival Internacional do Mundo Celta de Ortigueira é tamén un espazo de encontro cultural e tradicional onde, un ano más regresan propostas como o Festival na Rúa, que percorrerá os espazos máis emblemáticaos da vila; o Pequefestival, con representacións teatrais e musicales dirixidas aos máis pequenos; o Festival no Teatro, onde o público poderá gozar de sesións máis íntimas e cercanas;  os diferentes obradoiros de baile como o de baile galego ou baile irlandés, e contará tamén este ano co obradoiro de percusión; ou espazos que revitalizan o ambiente como a Feira de Artesanía. 

O Festival Internacional do Mundo Celta de Ortigueira, declarado de Interese Turístico Internacional en 2005, é unha das citas culturais máis multitudinarias do verán en España e un referente mundial da música folk e celta. Ano tras ano, o Festival reafirma o seu compromiso coa cultura, a diversidade e a convivencia, consolidándose como un espazo aberto onde conflúen músicas, tradicións e públicos de todo o mundo. 

As bases xa están dispoñibles na web do Festival e as obras poderán presentarse ata o 14 de xaneiro

O Festival Internacional do Mundo Celta de Ortigueira anuncia a apertura do concurso de carteis para a súa edición do 2026, que elixirá a imaxe oficial que ilustrará o Festival o vindeiro mes de xullo. O deseño elixido non só formará parte do cartel, senón que estará presente en toda a campaña publicitaria, accións promocionais e merchandising oficial do Festival do 2026.

Nesta ocasión, o Comité Organizador decidiu aumentar significativamente o importe do premio para o cartel gañador ata os 4.000 € e incorporar un segundo e terceiro premio, de 1.000 e 700 euros respectivamente. Refórzase así o seu compromiso co recoñecemento de diferentes talentos, estilos e artistas emerxentes, e búscase fomentar a participación tanto local como internacional neste certame.

O concurso está aberto a persoas físicas e xurídicas, individualmente ou en equipo, de calquera nacionalidade, convidando así a artistas de todo o mundo a presentar propostas que reflictan a identidade, espírito e valores do Festival, sumándose á ampla lista de autores consagrados que xa ilustraron o Festival en anteriores ocasións, como Siro López, González Collado ou Javier Mariscal, entre outros.  O prazo de recepción de obras comeza o 16 de decembro e finaliza o 14 de xaneiro.

O Festival Internacional do Mundo Celta de Ortigueira, declarado de interese turístico internacional no 2005, sendo o único Festival en España con tal galardón, converteuse por méritos propios nun dos eventos musicais máis multitudinarios de toda España e nunha cita ineludible do verán, así como nun dos referentes mundiais do folk e da música celta. A súa magnitude excede xa o puramente musical, consolidándose como un espazo libre onde conflúen xentes chegadas dos máis diversos puntos da xeografía mundial.

No 2026, o Festival Internacional do Mundo Celta de Ortigueira celebrarase do 9 ao 12 de xullo.

Bases e materiais dispoñibles en festivaldeortigueira.com/concurso-de-carteis/

Tras a excepcional ampliación para celebrar o 50 aniversario da Escola de Gaitas de Ortigueira deste 2025, o Festival retoma o seu formato habitual de catro días, celebrándose do xoves 9 ao domingo 12 de xullo do 2026

O Festival Internacional do Mundo Celta de Ortigueira do 2026 xa está en marcha. Tan só unha semana despois da finalización dunha histórica edición na que se conmemoraron os 50 anos de vida da Escola de Gaitas de Ortigueira, impulsora do Festival, o Concello de Ortigueira pon data ao Festival do 2026. Este durará catro días, do xoves 9 de xullo ao domingo 12 de xullo. 

Unha cita que volverá a converter a Ortigueira no epicentro do panorama folk a nivel mundial, contando de novo na súa programación con artistas internacionais e apostando por artistas noveis e emerxentes a través do Concurso Runas 2025, que se desenvolverá na próxima primavera. No 2026, a agrupación madrileña Xara, gañadora do Concurso Runas 2025, compartirá cartel e escenario con artistas con traxectorias consagradas e consolidadas. 

Con case cinco décadas de historia, o Festival Internacional do Mundo Celta de Ortigueira continúa renovándose sen perder a súa esencia. Esta próxima edición seguirá apostando pola calidade artística, a diversidade cultural e a unión entre as diferentes Nacións Celtas a través da música. A organización traballa xa no deseño da programación musical e cultural do 2026. 

Con este anuncio arrinca oficialmente o Festival Internacional do Mundo Celta de Ortigueira do 2026. Nas próximas semanas coñeceranse máis detalles sobre a programación, as bandas invitadas e as actividades complementarias. 

Durante cinco días de festa, tradición e música ao máis alto nivel, a vila da Ortigueira converteuse de novo no epicentro da cultura celta, acollendo a máis de 110.000 persoas, segundo estimacións da organización

Visitantes chegados de toda Galicia, do resto do Estado e do estranxeiro ateigaron a vila e os distintos espazos do festival, consolidando unha vez máis este encontro como unha das grandes citas culturais do verán europeo. Polo festival pasaron grupos míticos como Gwendal, Milladoiro, Flook ou a Kevrenn Brest Sant Mark. 

A edición 2025 do Festival Internacional do Mundo Celta de Ortigueira, especial e histórica pola celebración do 50 aniversario da súua fundadora, a Escola de Gaitas de Ortigueira, finaliza cun balance inmensamente positivo por parte da organización, tras cinco días de concertos, desfiles, obradoiros e actividades culturais, que encheron a vila de vida, música, tradición e intercambio cultural. 

Tamén foron moitos os asistentes que utilizaron o servizo especial de autobuses posto en marcha polo Concello de Ortigueira para facilitar os desprazamentos, rexistrándose 32.000 billetes de bus vendidos no trayecto entre o centro da vila e a zona de descanso próxima á praia. 

Éxito de participación e asistencia 

Unha vez máis, Ortigueira confirmou o seu papel como capital mundial da cultura celta, ofrecendo unha experiencia única que combina música, paisaxe, identidade e convivencia. Os obradoiros esgotaron as súas prazas, resultando novamente un éxito de participación. Os aparcadoiros estiveron completos, tendo que habilitar o polígono A Rega, especialmente durante as xornadas centrais do venres e sábado, cando a vila recibiu unha auténtica marea de visitantes e afeccionados á música celta chegados desde múltiples puntos da península.

Novidades implementadas en 2025 con ánimo de continuar e crecer 

Ademais das actuacións musicais e dos desfiles, esta edición tamén estivo marcada por importantes novidades que foron un éxito de acollida. A nova Vila Celta, espazo temático con artesanía, gastronomía e demostracións culturais, converteuse nun punto neurálxico do festival. Tamén houbo actividades para os máis pequenos, desenvoltas tanto ao aire libre como no novo espazo incorporado á programación na Biblioteca Municipal. 

Tamén cómpre salientar o excelente ambiente vivido na zona de descanso da praia de Morouzos, onde, como cada ano, milleiros de mozos e mozas gozaron do festival nun clima festivo, cívico e sen incidencias salientables, consolidando este espazo como un exemplo de convivencia responsable da música e da cultura celta.

O Festival Internacional do Mundo Celta de Ortigueira, que se celebra desde hai máis de 40 anos, é unha das citas máis importantes do calendario musical de Galicia e un referente a nivel mundial na promoción da música celta. Durante todo o evento, os asistentes teñen a oportunidade de vivir a diversidade e riqueza das tradicións celtas a través de concertos, actividades e encontros culturais.

O Concello de Ortigueira destacou o carácter interxeracional e integrador desta edición, cun festival que continúa medrando sen perder as súas raíces, declarado Festa de Interese Turístico Internacional, e desexa agradecer a participación dos veciños e veciñas unha edición máis, así como o intenso traballo e implicación de todos os colectivos que fan posible cada ano o éxito do evento: persoal sanitario, garda civil, policía local, bombeiros forestais, persoal de limpeza, Seprona, GES, voluntariado de protección civil, e, por suposto, a todos os traballadores do concello.

O Festival Internacional do Mundo Celta de Ortigueira culminou hoxe domingo unha edición histórica, marcada pola celebración do 50 aniversario da Escola de Gaitas de Ortigueira, protagonista absoluta dun evento que ela mesma axudou a iniciar en 1978, tres anos despois de fundarse, e que hoxe é un referente mundial da música Folk. 

Nesta edición na que pasaron grupos tan míticos como Gwendal, La Bottine Sourriante, Milladoiro ou Flook, e outros  de referencia dentro e fóra das nosas fronteiras como a Kevrenn Brest Sant Mark ou David Pasquet, a protagonista absoluta foi a Escola de gaitas da vila e os seus directores e integrantes, do pasado e do presente. A Escola de Gaitas de Ortigueira foi homenaxeada como símbolo vivo da cultura galega, cunha actuación moi especial no escenario Estrella Galicia na noite do venres 11, que serviu de antesala para o multitudinario Desfile das Nacións Celtas.

O Desfile das Nacións Celtas, encabezado pola Escola nunha formación inédita, composta por máis de 150 músicos de diferentes xeracións da institución, abriu a xornada do domingo.

Os 5 intensos días de festival pecháronse hoxe co seu momento máis emotivo: o agardado Desfile das Nacións Celtas, no que delegacións de diversos países de forte tradición celta se dan cita para compartir a súa cultura, música e danzas. Este desfile foi unha das maiores atraccións da xornada, reafirmando a vocación do Festival como unha plataforma para a difusión e o intercambio cultural. 

O desfile foi dirixido por Rodrigo López, director da Escola desde 2004 e encabezado polo actual Presidente Bruno Lozano, acompañados en primeira fila polos outros tres directores, Xavier Garrote, César Muíño, Xavier Pena (Bossa) e María del Mar Fernández quen tamén exerceu esa labor nalgúns intervalos. 

Participaron as formacións: Kevrenn Brest Sant Mark (Bretaña), Banda de Gaitas do Ortegal (Galicia), Banda de Gaites Castrillón (Asturias), Banda de Gaitas Ladrido (Galicia), Banda de Gaitas Lembranza Solpor (Galicia), Banda de Gaitas Xarabal (Galicia), Grupu Folclóricu Prau Llerón (Asturias), Banda de Gaitas Herba Grileira (Galicia), Caledonian Cowboy Collective Pipe Band (Escocia), Asociación Cultural Gamelas e Anduriñas (Galicia). 

Cabe destacar a sentida interpretación do himno galego dirixido polo primeiro Director da Escola de Gaitas de Ortigueira, e co-fundador do Festival, Don Xavier Garrote. Ningún dos presentes puido conter a emoción, nunha praza totalmente ateigada, co corazón e a respiración contida por todos e cada un dos integrantes da Escola, que contaxiou a veciños e visitantes vidos de diferentes partes do mundo, que se ben pode que non entenderan a letra, de seguro entenderon perfectamente o sentimento que envolveu ese instante histórico.

A Escola é unha institución cultural no municipio e símbolo da defensa da gaita galega como parte esencial da nosa identidade. “o 50 aniversario da Escola de Gaitas de Ortigueira é unha celebración de todo un pobo que leva medio século apostando pola súa cultura e polo poder transformador da música”, sinalou na inauguración o actual presidente, Bruno Lozano. 

O festival continuou durante todo o domingo, ofrecendo nestes cinco días a todos os visitantes, tanto aos que viron a pasar o día, como aos que residiron na vila ou aqueles que se achegaron a Morouzos, gozar dunha experiencia única en Ortigueira, un lugar onde cultiura, comunidade e música, mistúranse baixo a maxia das oito nacións celtas. 

O evento pechou esta noite cunha última xornada musical que estivo á altura da emoción vivida estes días. Este domingo 13 de xullo, arrancou ás 20:30 h os concertos da noite unha moi especial actuación das agrupacións do Concello de Ortigueira, Asociación Cultural Gamelas e Anduriñas, Troula do Ortegal e a banda de gaitas de Ladrido, e xa entre as 22:00 h e as 00:50 h, o escenario Estrella Galicia acolleu os concertos de Tiruleque, José Manuel Tejedor e Breo, poñendo o broche de ouro a unha edición para a historia. O Festival Internacional do Mundo Celta de Ortigueira, que se celebra desde hai máis de 45 anos, é unha das citas máis importantes do calendario musical de Galicia e un referente a nivel mundial na promoción da música celta. Durante todo o evento, os asistentes teñen a oportunidade de vivir a diversidade e riqueza das tradicións celtas a través de concertos, actividades e encontros culturais.