Ugía Pedreira e Óscar Gorriz dirixirán este espazo formativo de investigación artística, que pon o foco na creación autoral a partires da riqueza da lírica galega de tradición oral, no ano no que o día das letras galegas está dedicado á poesía popular oral personificada nas cantareiras

O Laboratorio de Cántigas Novas (O LAB) foi presentado este venres 14 de febreiro no Museo do Pobo Galego de Santiago de Compostela. No acto participaron: D. José López, conselleiro de Cultura, Lingua e Xuventude; D. Xosé Merelles, presidente da Axencia Galega de Turismo; Dna. María Concepción Losada, presidenta do Padroado do Museo do Pobo Galego; D. Víctor Freixanes, D. Valentín Calvín, alcalde de Ortigueira e membro do Comité Organizador do Festival e Dna. Ugía Pedreira, co-directora do LAB xunto con Óscar Górriz. 

Este proxecto sitúase como unha das accións formativas máis novidosas da programación deste ano. E é que o 2025 será unha edición moi especial xa que homenaxea aos 50 anos de historia da Escola de Gaitas de Ortigueira, impulsora e motor do Festival desde que Xavier Garrote a fundou alá por 1975. É precisamente este aniversario o que motivou a decisión unánime do Comité Organizador do Festival Internacional do Mundo Celta de Ortigueira de ampliar a cinco días a duración desta edición, que se celebrará do 9 ao 13 de xullo. 

Son moitas as sorpresas que está aportando este aniversario. A primeira delas arrincará o próximo mes de marzo coa posta en marcha dun área formativa coa que desestacionalizar o Festival e facer que este estea presente durante todo o ano na contorna de Ortegal. Para a ocasión, apóstase polo proxecto dirixido por Ugía Pedreira e Óscar Górriz. O éxito da actividade de creación popular de cántigas da pasada edición do Festival, motivou a posta en marcha deste Laboratorio de Cántigas Novas. 

O laboratorio, que se realizará de marzo a xullo cada dous sábados nas instalacións da Escola de Gaitas de Ortigueira, ten un custe de 200 € e está aberto a calquera persoa con interese na creación, composición ou interpretación da lírica popular galega. As inscricións están abertas ata o 24 de febreiro a través do mail lab@festivaldeortogueira.com. Toda a información está dispoñible en www.festivaldeortigueira.com 

O acto foi aberto pola presidenta do Padroado do Museo do Pobo Galego, Dna. María Concepción Losada quen, tras agradecer ás autoridades e resto de interlocutores a súa asistencia ao acto comentou que “é toda unha honra traer a esta casa o Festival Internacional do Mundo Celta de Ortigueira”. Tras o agradecemento, deu paso a Ugía Pedreira. 

Ugía Pedreira, co-directora do Laboratorio de Cántigas Novas, definiu o LAB como “un espazo para a exploración, para a experimentación onde desfrutar e aprender do proceso creativo e ir a un fin común: a construción de novas cancións. Nesta liña imos da autoría persoal á compartida,  ao grupo. Dinámica por outra banda muito interesante para a vida cotiá na resolución  de problemas ou ámbito relacional.”

Continuou desgranando que o LAB “entra no basal da música tradi:  elaborar e reelaborar cántigas, melodías e historias musicadas. Amalgamar poesía e música como dirían imos clásicos gregos, isto era menester entre cidadáns que se cultivaban “libres”. Nutrirémonos tamén da comunidade que nos acolle, a de Ortigueira. Recolleremos recursos e inspiracións na lírica e poética da saborosa lingua galega. Desde ela compoñemos a nosa vida. Somos as filas -os dos trovadores. Vimos como pobo de amplas sagas de compositoras, desde a neve dos tempos. Non é baladi que botemos por fora en creatividade, artistas diversos, poetas e  premios.”

“No Lab propoñemos abrir a coziña e cociñar entre todas e todos independentemente do nivel ou capacidades.  Imos seguir o pilar fundamental d musica popular. O feedback entre o autor autora e o coletivo. Crear patrimonio inmaterial desde um norte galego paradisíaco cargado de simbolismos, de patrimonio en pedra, natural,  arquitectónico ….cada 15 días alí vos esperamos do 8 de marzo que comeza ata inicio do Festival do Mundo Celta onde se presentarán as cancións.”

“É unha viaxe interna a un lugar ben especial mesmo atávico diría,  e así  o Lab tamén promove a descentralización das cidades en termos de innovación cultural e impulso artístico como é o Lab máis integral holístico e complementario a formato escola, centro ou conservatorio. Explicar o programa brevemente. Sesións creativas. Sesións comunais con foliadas nas parroquias. Sesións de mestría , ponencias ou talleres practicos.”

Tras a presentación da iniciativa, foi a quenda de D. Víctor F. Freixanes, presidente da RAG, quen agradeceu “ao espazo e á xente toda de Ortigueira, pois como ben dixo Ugía, a periferia ten unha riqueza da que non sempre nos decatamos. Este ano celebraremos esa riqueza o 10 de marzo en Cerceda e 17 de maio celebrarémolo en Malpica. Ademáis dos simposios e actos académicos en Muxía. 

É unha forma máis de descentralizar. Cando se nos falou deste acto, a Academia non podía faltar. Este ano, sobre todo, o Día das Letras Galegas, é moi importante ter en conta todos os actos e todas as iniciativas que se levan a cabo fóra de Galicia, en sitios como Bos Aires, Salvador de Bahía, Caracas ou Nova Iork. 

As cantareiras son esa reivindicación da enerxía vital do noso país voz anónima, que transmitiu en circunstancias moito máis duras que as nosas mantiveron viva a alegría de estar nós, de ser nós, e ademais de cantalo. 

Nós estamos agora a traballar desde a Academia en recoller a poesía popular de Manuel Murguía. Ata a propia Rosalía de Castro sen as cantigas populares, sen isto que estamos celebrando este ano, Cantares Gallegos non existiría, a nosa canción popular non existiría. Este tipo de celebracións nacen ás veces aparentemente de forma anónima, con pouca proxección social, e alcanzan sendo eventos de situacións de primeiro nivel. O Festival de Ortigueira é un evento de primeirísmo nivel, e sentímonos moi orgullosos de compartir con eles este acto.”

Valentín Calvín, alcalde de Ortigueira e membro do Comité Organizador do Festival, agradeceu a Dna. Concha Losada e ao padroado do Museo pola acollida, aos directores do LAB Ugía Pedreira e Óscar Górriz, “por pensar en nós para pór en marcha esta aventura”; e a D. Víctor Fernández Freixanes, Presidente da Real Academia Galega, “por nos acompañar na presentación desta iniciativa que tanto ten que ver coas tan merecidas depositarias do Día das Letras Galegas do 2025, as nosas Cantareiras.”

Tras agradecer o traballo do Director do Festival, Alberto Balboa, presente no acto, centrouse no aniversario da Escola de Gaitas de Ortigueira: “Unha Escola que 50 anos despois de ser fundada por Xabier Garrote está a recibir numerosas mostras de recoñecemento neste ano, a máis recente, a representación de Galicia na Feira Internacional de Turismo de Madrid o pasado xaneiro. Este aniversario é un evento especial para todos nós, e por iso o Comité Organizador do Festival decidiu por unanimidade ampliar excepcionalmente a duración desta edición do 9 ao 13 de xullo, facendo unha programación especial que contará cun concerto histórico e único de homenaxe a estes 50 anos, do que pouco a pouco iremos descubrindo novidades.”

Finalmente agradeceu a presenza do Presidente da Axencia Galega de Turismo, D. Xosé Merelles e do conselleiro de Cultura, Lingua e Xuventude, D. José López,  “polo apoio que tanto eles, como todo o goberno da Xunta de Galicia, a través de moitas das súas consellerías, están a dar ao Festival, sempre dispostos a axudar a seguir crecendo como capital do Folk do noso país; non en balde somos o único Festival declarado de Interese turístico Internacional, e o único destas características que é de balde, xestionado integramente por un concello.”

“Este Laboratorio reunirá a creadores e creadoras nun espazo formativo único e orixinal, co foco posto na creación a partires desta riqueza da lírica galega, incentivada por uns formadores expertos en cada unha das materias de interese que durante estes sábados alternos de marzo a xullo encherán de música e poesía as rúas de Ortigueira e das súas parroquias.” 

Rematou convidando a todos os creadores e creadoras “a encher as poucas prazas dispoñibles e acompañarnos nesta aventura creativa que de seguro deixará unha profunda pegada no eido cultural da nosa terra.” 

Continuou, D. Xosé Merelles, director da Axencia de Turismo de Galicia, quen tras agradecer a asistencia aos presentes comezou citando que “dous dos aspectos máis destacables para o turismo na nosa terra dentro das motivacións que fan vir á xente a Galicia son a cultura e tamén o patrimonio evidenciado a través dos nosos costumes. Todo o que ten que ver coa cultura e as nosas tradicións ten moito valor para o visitante. E non podía ser menos que desde a Xunta de Galicia traballásemos en poñer en valor unha das manifestacións culturais máis importantes que está no ADN dos galegos, que é o Festival Internacinal do Mundo Celta de Ortigueira.”

Agradeceu as palabras de Valentín Calvín e remarcou a colaboración que desde Turismo de Galicia se fai co Festival. Froito dela foi a visita a FITUR por parte da Escola de Gaitas de Ortigueira. 

“Congratulámonos de aparte de todo que o rodea o Festival nesa quincena de xullo, xurdan iniciativas como o Laboratorio de Cántigas Novas. Manifestacións e iniciativas como estas que están presentes no tempo e desestacionalizan o impacto da actividade turística, contan con todo o noso apoio.”

Rematou destacando que “a Declaración de Interese Turístico Internacional do Festival de Ortigueira é todo un impulso para xentes tanto do resto de España como do estranxeiro.”

Pechou o acto D. José López, Conselleiro de Cultura, Lingua e Xuventude quen manifestou que o LAB se trata “dunha iniciativa marabillosa que non podería ter outro xerme que non fose Ortigueira; nun ano no que imos pór en valor a tradición popular. Un recurso de dignificación, que sexamos propietarios dunha lingua transmitida de xeración en xeración a través das cántigas. Non só temos a obriga de protexer a tradición popular, tamén de garantila. Pero tamén de crear novos espazos onde a xente nova poida estar en contacto coa tradición popular galega e crear novas sinerxias.”

É fundamental construír Galicia desde moitos puntos de vista. E fundamentalmente desde o territorio. Os concellos forman parte imprescindible do noso eido cultural e as administracións non podemos máis que estar aos seu carón. Quero agradecer a Víctor Freixanes que hoxe estea aquí como presidente da Real Academia Galega, neste ano 2025 dedicado ás cantareiras e á poesía tradicional e a canción popular, que ademais vai redundar nesa descentralización da que falaba Ugía. Destacou a acollida do Museo do Pobo Galego na persoa da súa presidenta Concha Losada. 

Tamén remarcou, referíndose á presenza do Director Xeral de Turismo, Xosé Merelles, a unión cada vez maior que o ámbito da cultura e do turismo teñen entre si. O visitante non so ven pola parte gastronómica, paisaxística ou incluso climática, senón fundamentalmente e ultimamente veñan para desfrutar da nosa cultura.

Agradeceu a proposta do laboratorio “ás almas deste proxecto, Óscar e Ugía. O LAB é unha iniciativa marabillosa que non podería ter outro xerme que non fose en Ortigueira. É o sitio perfecto no contorno do Festival Internacional do Mundo Celta. Estamos traballando, xunto co alcalde de Ortigueira para por en valor e promocional o mundo das bandas e escolas de gaitas como é a Escola de Gaitas de Ortigueira.”

Rematou destacando que este ano “apróbase o expediente de BIC por parte da Xunta de Galicia, a través da Consellería de Cultura, da música e o baile tradicional galego, que vai permitir por en valor este recurso fundamental, polo que significa tamén como recurso dinamizador no uso da nosa lingua. Ser propietarios dunha lingua é o maior tesouro que podemos ter como galegos, e esta lingua, en moitos casos, se mantivo, se trasladou de xeración en xeración a través da música popular e das propias cantigas.

Con este proxecto imos facer algo do que a cultura galega estaba necesitada, non so garantir a tradición popular, senón que imos crear novos espazos para innovar, crear e actualizar ese recurso. Non temos que ter medo a iso.  

Finalmente destacou o acerto da organización de elixir o Museo do Pobo Galego para esta presentación, tanto pola parte da tradición pero tamén por por en valor unha institución da que todos somos legatarios pero na que todos podemos e debemos construír, para que este museo ocupe ese espazo central que desde logo ocupa na cultura galega. 

O acto rematou coa interpretación dunha peza musical interpretada por Ugía Pedreira, Uxía Senlle e Óscar Gorriz. 

A delegación do Festival estivo presente na xornada do sábado 25 de xaneiro en FITUR, presentando as súas novidades e un avance dos artistas participantes 

O 2025 preséntase como unha edición na que a homenaxe aos 50 anos de historia da Escola de Gaitas de Ortigueira, impulsora e motor do Festival durante os seus 47 anos de vida do Festival, terá un oco especial nesta edición. Este aniversario marca un encontro musical e cultural que amplía a cinco días a súa duración, do 9 ao 13 de xullo do 2025. Integrantes da Escola de Gaitas acompañaron á delegación e á organización do Festival nun acto que concluíu cunha actuación musical para o deleite dos asistentes. 

Tras percorrer o recinto ferial facendo resoar gaitas, bombos e tambores, unha nutrida representación da Escola de Gaitas de Ortigueira entrou no stand de Galicia de FITUR para a presentación do Festival ante decenas de curiosos que encheron o espazo destinado para o público. O acto comezou coa intervención de Carmen Pita, directorade Promoción de Turismo de Galicia, quen destacou a importancia do Festival como único da península declarado de Interese Turístico Internacional. “Recoñecido mundialmente, este evento arranca a súa andadura en 1978 e é sen dúbida unha cita cultural e turística ineludible que ano tras ano reivindica e difunde a cultura folk e celta en todo o mundo, en especial desde o panorama emerxente e tradicional de Galicia”, concluíu, antes de dar paso aos representantes do Festival alí presentes. 

Valentín Calvín, alcalde de Ortigueira, iniciou a súa intervención agradecendo a oportunidade de poder presentar Ortigueira ante “o maior e mellor escaparate mundial do turismo”. Na súa intervención destacou a importancia do papel que a Escola de Gaitas tivo durante os seus 50 anos de vida, poñendo en valor a súa labor cunha “programación especial e un día propio no que entre outras moitas actividades terá lugar un concerto único do que pouco podo desvelar por agora, pero que de seguro será inesquecible para todos aqueles nos visitedes este verán”. Esta non é a única sorpresa que presentará este ano o Festival, dado que tamén anunciou a posta en marcha dunha Área Formativa permanente coa que desestacionalizar o Festival. Acción que se levará a cabo a través do “Laboratorio de Cántigas Novas”, un obradoiro de creación poética e musical que parte da lírica galega e da tradición oral, nun ano no que “a Xunta de Galicia adica as Letras Galegas xustamente ás Cantareiras”. 

Unha das intervencións máis agardadas cada ano, o avance da programación, veu da man de Alberto Balboa, director do Festival, quen introduciu unha pequena mostra da programación que dará forma a un cartel que reúne artistas consagrados con novas promesas do panorama folk. Nomes como os galegos Milladoiro, Gwendal, La Bottine Souriante, Dallahan, Flook, Tiruleque, Tejedor, Böj, Alana o Buíoch, xunto con, por suposto, a Escola de Gaitas, formarán parte do cartel do 2025. 

Interviu tamén Bruno Lozano, presidente da Escola de Gaitas de Ortigueira, quen destacou e agradeceu ao Concello de Ortigueira o traballo e colaboración brindados durante a historia da Escola e, en especial, a homenaxe deste ano, en que a Escola cumpre 5 lustros de vida. Posto que esta edición contará cun día máis con actividades especiais nas que a Escola será protagonista. Quixo tamén destacar o traballo e esforzo de todos os implicados na organización do Festival: “Todo este esforzo que desenvolvemos de setembro a xullo está aliñado por unha enerxía inesgotable. A do noso amor pola nosa cultura e a nosa terra. É esa vocación de unión, de compartir experiencias, cultura e música con xente procedente de todas as partes do mundo, a que fai que sempre nos recompense con creces todas as horas de soño invertidas”. 

Pechou o acto o alcalde de Ortigueira, invitando aos presentes a visitar un evento único nas súas características, que converterá a Ortigueira na capital mundial do folk. Agradeceu tamén o esforzo de patrocinadores públicos e privados e da Xunta de Galicia, “que cada ano aposta con máis forza polo que é o único Festival declarado de Interese Turístico Internacional”. Para finalizar, deu paso a un peche de acto moi especial: por primeira vez na historia, a Escola de Gaitas fixo vibrar cos sons dos seus instrumentos aos asistentes. 

O Concello de Ortigueira presentou hoxe, sábado 18 de xaneiro, o cartel e un pequeno avance da programación da cita do 2025, que se celebrará do día 9 ao 13 de xullo nunha edición marcada polo 50 aniversario da Escola de Gaitas de Ortigueira. 

O acto de presentación tivo lugar, como é habitual, no Teatro de Beneficencia de Ortigueira. Nel presentouse o cartel oficial e proxectouse un vídeo cun avance da programación do 2025, ademais de presentar algunhas das moitas novidades que acompañarán a esta edición. No acto interviñeron Valentín Calvín, alcalde de Ortigueira; Alberto Balboa, director do Festival; Bruno Lozano, presidente da Escola de Gaitas; Mónica Fustes, autora do cartel e Óscar Gorriz e Ugía Pedreira, directores do LAB (Laboratorio de Cántigas Novas) que se iniciará en Ortigueira en próximas datas. 

Nesta edición, o cartel foi un encargo á veciña e ilustradora de Espasante, Mónica Fustes, que creou unha peza única único co que homenaxea desde o cariño e a experiencia persoal ao Festival e á Escola de Gaitas, que este ano celebra o seu 50 aniversario no marco do Festival. Na presentación, Mónica agradeceu ao Comité Organizador a súa selección e a todas as persoas que a apoiaron durante o proceso creativo. A deseñadora incluíu á comunidade no cartel a través dunha enquisa realizada en Instagram na que preguntou polo significado do Festival, cuxo resultado foi a incorporación de palabras representativas das Nacións Celtas: orgullo, respecto, amizade, raíces, liberdade e música. Estas palabras represéntanse no cartel desta edición nas diversas linguas das Nacións Celtas, acompañadas de ilustracións cargadas de simbolismo. 

Despois foi a quenda de Bruno Lozano, presidente da Escola de Gaitas de Ortigueira, quen centrou o seu discurso no agradecemento ao Concello e a Mónica por incluír o medio século de vida da Escola na programación do Festival e cartel. A edición contará cun día máis para dar cabida a actividades especiais en homenaxe á Escola. Ademais, Bruno avanzou tamén algunhas das bandas de gaitas participantes nesta edición: Banda de Gaitas Xarabal, Banda de Gaitas Lembranzas Solpor de Galicia, Banda de Gaitas Villa Mieres e Grupo Folcroricu Prau Llerón desde Asturias e Kevrenn Breiz Sant Mark desde Bretaña. 

Ugía Pedreira e Óscar Górriz presentaron o Laboratorio de Cántigas Novas. Unha iniciativa posta en marcha polo Concello de Ortigueira a través da Área Formativa do Festival e que estará coordinado pola Escola de Gaitas de Ortigueira. Este proxecto porá o foco na creación autoral, individual e colectiva, a partir da tradición oral galega e coa vista posta na contemporaneidade. Está aberto a toda persoa maior de idade interesada na composición lírica e o uso artístico da lingua galega. As prazas serán limitadas a 25 participantes. Terá lugar durante 12 sesións de traballo en sábados alternos desde marzo ata xullo. O seu coste será de 200 € e contará con clases maxistrais de varios artistas e expertos na música galega e internacional. As pre-inscricións poderán realizarse enviando nome completo e número de teléfono ao mail lab@festivaldeortigueira.com desde hoxe e ata o 24 de febreiro ás 23:59h. 

Alberto Balboa, o director do Festival, destacou os aspectos artísticos e musicales, presentando “una programación que combina músicos legendarios con nuevas colaboraciones musicales, músicos noveles con bandas ya asentadas y que quizás aborden a su despedida”. Desveló un avance dos artistas que pasarán polo escenario de Ortigueira este verán. Estarán entre outros, Alana, Buíoch, Gwendal, Milladoiro, La Bottine Souriante, Dallahan, Flook (no seu 30 aniversario), Tiruleque, Tejedor,  Boj e como non a Escola de Gaitas de Ortigueira. Alana e Buíoch repetirán experiencia no Festival tras gañar o Concurso de Runas no 2024, e compartirán escenario con grupos que xa formaron parte da historia do Folk mundial como os galegos Milladoiro, Gwendal (tras o seu 50 aniversario) ou La Bottine Souriante, que volve ao Festival tras 16 anos para presentar o seu novo disco. 

Valentín Calvín, alcalde de Ortigueira, pechou o acto remarcando que unha vez máis o Festival estará “cargado de música, cultura, actividades e cun cartel dos máis sentidos e emotivos que tivo o Festival en toda a súa historia, e que volverá a distinguir a Ortigueira como capital mundial do Folk”.

Tamén quixo agradecer a labor de todos os “involucrados que fan posible este evento único”. Desde os patrocinadores públicos e privados, ata os artistas e voluntarios, protección civil, corpos e forzas de seguridade do Estado, técnicos e traballadores do Concello de Ortigueira, encabezados desde o Comité polo director do Festival, Alberto Balboa. “Tampouco me cansarei nunca de agradecer á Escola de Gaitas de Ortigueira a labor ano tras ano, e neste ano tan especial para a súa historia, que é a historia do Festival. E por suposto, a todo o pobo de Ortigueira polo seu esforzo en que cada edición do Festival sexa mellor ca anterior”. 

O acto concluíu cunha velada musical da man dun cuarteto formado por integrantes da Escola de Gaitas. 

O Festival recibiu este 2024 unha cunatía de 35.000€ por parte do ente público 

O Instituto Nacional das Artes Escénicas e da Música (INAEM), dependente do Ministerio de Cultura, convoca cada ano o seu programa de apoio a festivais, mostras, certames e congresos de lírica e música. Centenares de institucións, concellos, festivais ou mostras preséntanse cada ano. Na convocatoria deste 2024 o orzamento total foi de 1.974.500,00 €. 

O Festival Internacional do Mundo Celta de Ortigueira posiciónase como un dos poucos festivais galegos que reciben dita subvencións, sendo este ano o que maior importe recibiu. Nesta convocatoria o importe concedido aumentou em 3.000€ respecto á convocatoria anterior, ascendendo a un total de 35.000€. Esta cuantía duplica a outorgada a outros festivais galegos nesta convocatoria, consolidando o compromiso do Ministerio de Cultura co crecemento do Festival Internacional do Mundo Celta de Ortigueira. 

O programa do INAEM axuda a conformar un festival de éxito internacional, ademáis de posicionalo como un dos festivais ineldubles do verán galego e como referente no panorama musical internacional. Unha aposta que permite que cada ano formen parte da programación do festival artistas de prestixio internacional, ademais de continuar coa aposta por promocionar o talento local emerxente. 

O festival recibiu 65.000€ este 2024

No marco da convocatoria do programa de subvencións a concellos e entidades locais para o apoio ao desenvolvemento de festivais audiovisuais, musicais e de artes escénicas na provincia de A Coruña durante o 2024, o Festival Internacional do Mundo Celta de Ortigueira é beneficiario destacado un ano máis. 

Máis dunha veintena de festivais e concellos de diferentes características da provincia de A Coruña foron concesionarios deste programa de axudas. O Festival Internacional do Mundo Celta de Ortigueira foi este 2024 o encontro musical galego que maior importe subvencionable recibiu, un total de 65.000€, seguido de festivais cinematográficos como o Festival Internacional de Cinema Cineuropa ou o Festival Internacional de Cinema Curtocircuito, ambos en Santiago de Compostela, cunha subvención de 60.000€. 

Unha axuda que fai posible que o Festival crezca cada ano, superando nesta edición os 100.000 visitantes, e que manteña o seu compromiso coa visibilización do panorama folk e celta tradicional e emerxente, tanto en Galicia como internacionalmente. 

A organización aposta por ampliar as datas de catro a cinco días de duración, do 9 ao 13 de xullo

O 2025 será un ano para o recordo para a Escola de Gaitas de Ortigueira que celebra o seu 50 aniversario, un fito significativo co que se celebra a súa dedicación, preservación e promoción da música tradicional galega. Con este motivo, o Comité Organizador do Festival Internacional do Mundo Celta de Ortigueira, reunido a semana pasada, decidiu ampliar un día máis as datas do festival, coa intención de adicar unha xornada especial ás cinco décadas de historia da Escola de Gaitas. 

‘La Escola’ (como se coñece entre os ortigueirenses) é un piar fundamental na organización e desenvolvemento do Festival Internacional do Mundo Celta de Ortigueira desde que o fundou en 1978. Este converteuse nun dos eventos musicais máis multitudinarios de toda España e nunha cita ineludible do verán, así como un dos referentes mundiais do folk e da música celta. 

A programación cultural e musical do festival terá unha duración de cinco días, do mércores 9 de xullo ao domingo 13 de xullo, ampliando un día máis a duración do evento respecto á edición do 2024. Mantendo a liña dos últinos anos a programación centrarase en atraer a grupos de referencia do panorama Celta internacional pero prestando especial atención atención tamén ás novas propostas emerxentes da escena tradicional galega. 

O cartaz completo será presentado nos vindeiros meses e, como xa se anunciou, será obra de Mónica Fustes, veciña de Espasantes elixida polo Comité Organizador. Mónica é unha destacada artista e profesional do marketing, que co seu cartaz representará o espíritu do Festival e homenaxeará o medio século de vida da Escola de Gaitas de Ortigueira.

O Comité Organizador aposta polo talento local para a imaxe dunha edición marcada polo 50 aniversario do nacemento da Escola de Gaitas de Ortigueira.

En 2025, a Escola de Gaitas de Ortigueira celebrará o seu 50 aniversario, un fito significativo que destaca o seu medio século de dedicación á preservación e promoción da música tradicional galega. 

A Escola de Gaitas foi un piar fundamental na organización e desenvolvemento do Festival Internacional do Mundo Celta de Ortigueira desde que o fundou en 1978. Este converteuse nun dos eventos musicais máis multitudinarios de toda España e nunha cita ineludible do verán, así como nun dos referentes mundiais do folk e da música celta. A súa magnitude excede xa o puramente musical, consolidándose como un espazo libre onde conflúen xentes chegadas dos máis diversos puntos da xeografía mundial.

O cartel de 2025, que será presentado oficialmente nos próximos meses, espérase que sexa unha obra que non só represente o espírito do Festival, senón que tamén celebre medio século de música impulsada pola Escola de Gaitas de Ortigueira.

Mónica Fustes, veciña de Espasante, é a elixida polo Comité Organizador para deseñar o cartel. Mónica é unha destacada artista e profesional do marketing que deixou unha pegada significativa en cada proxecto que realizou. 

Desde moi nova mostrou unha inclinación natural cara á arte, destacando especialmente no debuxo. Ao longo da súa carreira colaborou con diversas asociacións de Ortigueira, creando carteis e logotipos como o de O Son Cervexeiro e a identidade visual de ASPROMOR. En 2021, inaugurou “O Curruncho dos de Sempre”, unha exposición altruísta de retratos a lapis de 40 persoas destacadas de Espasante.

Valentín Calvín, alcalde de Ortigueira, expresou a súa satisfacción con esta elección por parte do Comité Organizador: “Mónica Fustes non só representa o talento e a creatividade de Ortigueira, senón que tamén é unha fervente coñecedora da historia do Festival e da Escola de Gaitas. Estamos seguros de que o seu traballo reflectirá a importancia deste fito histórico.”

A nosa páxina de Facebook atópase actualmente suspendida por motivos completamente alleos ao Festival de Ortigueira.

Estamos a traballar para resolver esta situación e recuperala canto antes. Pedimos desculpas por calquera inconveniente que isto poida causar e agradecémosvos a vosa paciencia e comprensión.

Mentres tanto, convidámosvos a seguirnos no resto das nosas redes sociais para mantervos informados de todas as novidades e actualizacións.

O trío galego e o cuarteto irlandés actuarán no Festival de Ortigueira 2025 como gañadores da 25.ª edición do certame.

Nunha edición memorable do Festival Internacional do Mundo Celta de Ortigueira, o xurado do Concurso Runas decidiu, de maneira excepcional, outorgar o primeiro premio a dous grupos debido á alta calidade das súas actuacións.

Alana e Buíoch destacaron polo seu virtuosismo musical, creatividade e capacidade para conectar co público, o que fixo practicamente imposible decantarse por un único gañador.

Alana, que na fase previa do concurso xa conquistara ao público na votación en liña, subiu ao Escenario Estrela Galicia un repertorio que mestura a música tradicional galega con ritmos contemporáneos de base electrónica e pop. O trío galego, formado por Eloy Vidal, Antía Vázquez e Pablo Castro, conectou desde as primeiras cancións cos asistentes á Alameda, no que foi un dos concertos con máis éxito da noite.

Buíoch, formado por Dale Mckay, Ruaidhrí Tierney, Kurt Dinneen Carroll y David Harte, é un grupo de música tradicional irlandesa que compón arranxos e as súas propias melodías. O cuarteto, orixinario das Midlands de Irlanda, encheu o Escenario Estrella Galicia cun son tradicional pero progresivo nunha impecable actuación que cativou ao público e ao xurado pola súa orixinalidade e enerxía.

Picarós, que tamén competiu nesta rifada final, ofreceu unha sobresaliente actuación que demostrou o seu gran talento e dedicación. Aínda que non lograron o primeiro premio, o trío mantivo o alto nivel ao que nos teñen afeitos nos últimos anos os grupos procedentes do panorama folk asturiano.

O xurado, que quere felicitar aos tres grupos polo seu nivel e profesionalidade, estivo integrado por Alberto Balboa (director do Festival Internacional do Mundo Celta de Ortigueira), Bruno Lozano (presidente da Escola de Gaitas de Ortigueira) e Segundo Grandío (produtor musical).

O Concurso Runas, que vén celebrando desde o ano 2000, ten como obxectivo a difusión da cultura e música Celta a través da promoción de grupos noveis, primando sempre as composicións propias. O certame mantense fiel aos seus principios, aínda que no camiño evolucionou nas súas formas. Xa son máis de 250 bandas nacionais e internacionais as que pasaron por el, o que indica a importancia desta plataforma de promoción de grupos noveis dentro da música celta e folk.

O festival celebrou catro días de concertos, desfiles e obradoiros repletos de público, a pesar da choiva nalgúns momentos da noite durante a primeira e última xornada, que tivo que suspender o seiu último concerto del domingo.

Miles de persoas fixeron por cuarto día consecutivo o paseo habitual desde a zona de descanso de Morouzos, ou ben usaron o servizo de buses implantado polo concello. Igualmente os aparcamentos estiveron cheos especialmente os días centrais, venres e sábado, nos que de afeccionados á música celta chegados de moi diversos puntos da península abarrotaron a vila, demostrando que Ortigueira durante estes días convértese na capital mundial da música celta.

O domingo comezou coa saída desde a Alameda ortegana ás 11:30 h das once bandas participantes no Desfile dás Nacións Celtas e finalizou nunha explosión de música ao redor das 15 h na praza Isabel II. Encabezadas pola Escola de Gaitas de Ortigueira, a sigueron no desfile a Bagad Brieg, de Bretaña, Peoples Ford Boghall & Bathgate Caledonia Pipe Band, de Escocia, Asociación Cultural Galega Rosalía de Castro, de Barcelona, Banda de Gaitas de Vega de Espinareda, do Bierzo, Banda de Gaites Candás, de Asturias,  Banda de Gaites Villaviciosa o Gaiteiro, Banda de Gaitas Ladrido, Banda de Gaitas do Ortegal, Asociación Cultural Troula do Ortegal, e finalmente a coruñesa Asociación Cultural Donaire.

Pola tarde, Troula de Ortegal e A Requinta de Lampai animaron as rúas de novo, e no teatro de beneficencia cos Carunchos deixaron mostra da súa calidade nun espazo unha vez máis, cheo ata a bandeira, neste caso ata a bandeira das oito nacións celtas.

Xa entrada a noite, tiveron lugar os concertos tamén por cuarto día no Escenario Estrela Galicia. Ás 21:30 h abriu a xornada nocturna a Asociación Cultural Donaire, que compartiu interese coa final da Eurocopa de fútbol que se emitía na pantalla instalada polo Concello na praza de Isabel II.

Ás 22:45 h, Muro Kvuartet demostrou o acertado da súa elección como gañadores do Runas 2023, reafirmando o seu talento e facendo gala da súa evolución musical durante este último ano, pasando de promesa no panorama folk a unha realidade consolidada, á vez que animada e participativa, pois fixo bailar en #roda aos espectadores que baixo a choiva dese momento gozaban do festival.

Seguidamente, ás 00:15 h, o asturiano Jose Manuel Tejedor, gañador dun Premio Nacional de Música e tres veces gañador do Trofeo Macallan, trouxo a Ortigueira o seu último traballo “Lluz” cheo de melodías.

O último concerto, previsto para as 01:45 h a cargo de Böj, tivo que ser cancelado pola intensa choiva, que afectaba ao escenario.